شلبكيات

أبو شلبك يطلب المساعدة

شباك ابو شلبك

شباك أبو شلبك: من ص3 العدد الأخير من ساخر سبيل
العنوان : مشهد مسرحي بعنوان .. أبو شلبك يطلب المساعدة
اللغة المستخدمه: الفصيحه والمحلية الفلسطينية الأردنية وبعض كلمات من الإنجليزية.
المناسبة: المشاكل التي قد تنجم عن ترك الأب لعائلته بسبب العمل ببلد بعيد.
عمل أبو شلبك :موظف في دبي
المكان والزمان: بلاد الغربة. بكل الأوقات.
كتب: محمد هارون.
*****
( ابو شلبك يتمشى وحيداً داخل الغرفة …متوتر ينظر لساعته كل دقيقة… بجانبه حقائب سفر… يقطع توتره رنين هاتف المنزل )
أبو شلبك يرد: وعليكم السلام يا بابا… الله يسلمك ويطول عمرك يا شلبك ياحبيبي ..والله صار لي ساعتين ثلاثه واصل من دبي… أه أه كله تمام وانا حاليا بنص البيت بتورونتو …. الحمد لله كله تمام…. أمك واخوانك ناموا … المهم شوأخبار دراستك في مك ماستر؟…الله يرضى عليك يا حبيبي طول عمرك رافع راسي ….الجمعة المساء جاي… اهلا وسهلا…. ( متضايق) أخوك شامخ ما شوفته …لأ ما اجا للمطار… جيت بتكسي من المطار… جييت وهيني بستناه علشان أشوفه قبل ما أنام… هاهاه صوت الباب فتح…. هاي اخوك شرّف .. الله معك نشوفك الجمعة ان شاء الله.
( يدخل شامخ بملابس غريبه واكسسوارت غربية وبيده سيجارة يلاحظ ابوه …فيقبل عليه)
شامخ : واو واو ذاتس انكراديبل …داد …هاو أر يو سابر؟
ابو شلبك : سابر.. وبعدين سابر حاف هيك…. صابر صابر يا محترم .. ما بدك تسلم علي… وتبوس ايدي ياولد… تخاشمني!!
( يتقدم شامخ نحو أبيه والذي يصده ويكمل) ارمي السيجاره من ايدك وارفع بنطلونك احسن ما يطيح على الارض.
شامخ : ايزي نو بربلم ( يفعل ما طلبه ابوه ثم يعانقه ببرود) تكيت ايزي داد …هاف اسيت بليز.
أبو شلبك : اسمع ما تاكلني وتضحك عليّ بكلمتين حلوين…. خلينا بالمهم… اول شي انت وين لحد الان…. وليش ماجيت على المطار تاخدني؟؟؟ .
شامخ : اي هافنت تايم ( يقاطعه ابوه وبصوت مرتفع )
ابو شلبك : في البيت إحكي معي عربي وفي الكلية إحكي انجليزي ..هدا اذا رحت على الكلية اللي صار لك مقاطعها اكثر من شهر..وين كنت؟
شامخ : كنت في رحلة على فلوريدا؟
ابوشلبك : بوقت الدوام والدراسة …وبعدين مش احنا متفقين انه تخبرني لما تسافر وتترك امك واخوانك !!
شامخ: بابا… احنا في كندا كله نظام وقوانين وآمان.. اند سيفتي.
ابو شلبك : سيف يقص رقبتك ..انا عندي تعليمات وقوانين في البيت لازم تمشي عليها.
شامخ : كيف يعني؟
ابو شلبك: الصحو النوم السهر الأكل… كله الو نظام … واهم شي دوام الجامعة.
شامخ : احنا بكندا والحرية للجميع ( يقاطعه)
ابو شلبك: حرية شو .. انت جاي تزايد عليّ يا ولد… وبعدين انت بتعرف ليش احنا أصلاً هون… خليني أذكرك .. من شان التعليم المحترم، ومن شان نعالج اختك المريظة (يقاطعه ابنه)
شامخ : ما انت تاركها وقاعد بدبي ( يرتفع صوت الاب ثم يخفضه بالتدريج )
ابو شلبك: اخرس يا متخلف… لشو بدك توصل …والله لولا الناس نايمه، لمعصتك معص….ولك انا تارك أختك بكيفي وبخاطري؟؟…أنا في دبي بشتغل وبموت من التعب والوحده والخوف عليكم، وانت هون تاركهم وصايع .. وتارك كل الأمور على أخوك اللي بجي للبيت مره، مرتين بالشهر.
شامخ : داد ريّح نفسك وتعال عيش معنا بكندا .
أبو شلبك : ياريت..يا ريت احصّل شغل هون واقدر اصرف على البيت.
شامخ : وت كان اي دو فور يو… انت لازم تختار.
ابو شلبك : أنا أخترت زمان… أنا بشتغل بره وأنتوا بتدروسو وبتعيشوا هون …وهيكوا اخذتو الجنسية الكندية…. ظايل تاخد الشهاده الجامعية وتشتغل… من شان انا أرجع وأعيش معكم وأخذ الجنسيه اللي ما اخدتها لحد الان من شانك.
شامخ: من شاني !!؟ ( يرن تلفونه ) سوري داد ( يرد ) يس شوشو سبيكينك ..اي كانت اي كانت ناو …وي هاف رولز اند انستراكشن إن أور هاوس ( الاب يتابع ..) تومورو وي ويل سي… باي…باي. شوفت داد انا ملتزم في الرولز تبعك.
ابو شلبك : والله يخلف عليك…طيب امتى بدك تلتزم بدروسك؟؟
شامخ: دونت وري المهم ناو….. انه نرتب لك جواز سفر كندي؟
ابو شلبك (مستغربا ) جواز كندي كيف يعني هات لشوف يا جيسن كيني يا ابن أبوشلبك!! .
شامخ : نو بروبلم طالما معك شوشو أبو الشموخ انت بخير.. جوازات سفر…دخان… منشطات…بي ار سي… اي بيزنس… ايم ريدي .
أبو شلبك: ( يغضب ) ولك انت مين مربيك ؟ أنت واحد سخيف… أنت لازم تروح على البلاد وتشتغل مع البلطجية والزعران اللي مثلك. …والله لاذبحك…..(يتجه نحو ابنه الذي يهرب للخارج)
شامخ : نو نو نو…. وير إز ماي فون… 11 9
( يختفي الولد ويعود الأب لاهثاً)
أبو شلبك : ( يحدث نفسه بهدوء) الغربة مثل العتمة دهنت روحي بالوحشة والقلق ، وأنا دهنت قلبي بالأمل …وعلفاضي ( يرتفع صوته ويتجه للجمهور ) شو الحل ياناس الولد… أو البلد … اذا رجعت للشغل لدبي الولد بصيع وبضيع … ومثل ما بتعرفوا الأم صعب تسيطرعلى الأولاد رغم توفر الفلوس… واذا ظلينا معهم بكندا ما عندي شغل يعني ما في فلوس…. والله أمران أحلاهما مُر….
ساعدوني ساعدوني …يا ناس..
***

اظهر المزيد

مقالات ذات صلة

زر الذهاب إلى الأعلى
error: Content is protected !!
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock