مشهد تمثيلي بعنوان : فرفطة روح ….
المكان : شقة أبو شلبك بضواحي توروتنو
الزمان : سنة أولى – حقبة الكورونا … ( تنذكر وما تنعاد )
المناسبة : الحظر والحشر…
اللغة المستعملة : الفصيحة و العامية الفلسطينية و المصرية.
***
أم شلبك ( عند باب الشقة وابو شلبك خارجاً ) : رايح فين؟
ابو شلبك (مستاء) : رايح صلاة الجمعة يا ستي …عندك اعتراض؟؟.
ام شلبك : أستغفر الله العظيم ..!!
أبو شلبك : شو هو أنا كفرت… وصرت يعني من جماعة أبو جهل!!.
أم شلبك : أنت صاير من جماعة الجهل والخرف.. أنت رايح تصلي الجمعة ؟
أبو شلبك : نعم .. يا ستي أخيراً الحكومة فتحت الكنايس والمساجد.. واليوم سمحت النا بصلاة الجمعة وبشروط صعبة.. عشان هيك بدي أطلع بكير شوي، حتى أحجز مساحة أصلي فيها الجمعة .
أم شلبك : اليوم الخميس يا مولانا !!
ابو شلبك : شووو.. وين الرزنامة.. وين الساعة ( ثم ينظر لساعته ) Thursdayصح الخميس !!! ..هذا اللي اجانا من كورونا…
أم شلبك : الخميس .. يلا ارتاح … يعني ما سألتنيش عن أخبار أهلي بمصر ..انا كلمتهم قبل شوية.
أبو شلبك :معلش والله انا مشلبك.. شو أخبارهم طمنيني ان شاء الله ما حد تضرر من هالكوفيد 17 ؟
أم شلبك : الحمد لله ما حدش تضرر .. ( ترفع صوتها) من الكوفيد 19
أبو شلبك: الحمد لله وأهلي بالبلد وضعهم كويس لكن الكل متبهدل من الكوفيد ال ..كم الرقم (ام شلبك: 19 ) ( يكمل ) صح 19 .. طالما الامور ماشية و ما دام أنا لابس لابس خليني اروح اصلي الظهر بالجامع .
أم شلبك : لسه الجوامع ما فتحتش بمنطقتنا الا لصلاة الجمعة….. ارتاح يا حج .
أبو شلبك : هو ضل فيها حج حتى الحج سكروه السنه .. استغفر الله وبعدين بهالوباء المجرم .. تقولي ابليس راكبنا !!.
أم شلبك : ربنا كريم… . اقعد في البيت وخلاص .
(هاتف ابو شلبك يرن .. يرد)
أبو شلبك : عن اذنك هاي مكالمة خارجية من الخليح .. من جاسر.. أهلا وسهلا شو اخبارك طمني عنك. ( يصمت والكاميرا على وجههه والكلام مش عاجبه )
بس يا جاسر دعم الحكومة الكندية للكنديين اللي تضرروا من كورونا مش لاي كندي برة البلد وعايش فوق الريح .. اه بعرف كل الناس تضررت لكن .. يا صاحبي شوف المحاسب تبعك هون وهو بيعطيك التفاصيل .. انا شو دخلني .. نعم أنا مختار الجالية صحيح .. واللي معارفي صحيح.. لكن هاي دبرها ما دبرها ما بتمشي هون .. ( معصب ) يا زلمة والله عيب.. ايش بتعطيني منهم نسبة وما نسبة .. عن اذنك ..
( يغلق الهاتف غاضباً )
أم شلبك : خير … في اه؟
ابو شلبك : الكورونا عملت بالناس البلاوي .. اشي بيخزي ..اقولك بدي اغير جو .. صرت لابس لابس فرفطت روحي ..خليني اطلع أساوي اشي مفيد .. ( يفكر بسرعة ) خلينا أكب الزبالة .
أم شلبك : هاي خامس مرة بتكب الزبالة اليوم…وبعدين فيك، يا راجل ريلاكس .. STAY HOMEالتعليمات بتقول كدة… اقعد بالبيت ؟.
أبو شلبك: ما هو اشي بجنن!! ساعة بيقولوا النا اطلعوا بره البيت في مشكلة جوا البناية، وساعة بيقولوا خليكم في البيت في مشكلة برة البناية .. وبعدين وين نروح؟؟..
أم شلبك : أنا عارفة.. أنت بس عايز تطلع وتنقل المرض لينا.. بكفي أنك من يومين تلاته كدة خرجت طول النهار ومش عارفة رحت فين ؟.
أبو شلبك : صراحة… طلعت مع صاحبي راتب ، وشاركنا بمظاهرة ضد العنصرية تضامنا مع صديقي جورج فلويد .. والحمد لله ..ما جبت المرض معي .
أم شلبك : انت بتتلكك .. في العالم أكثر من مليون فلويد وما عمركش ما تعاطفت معهم .
أبو شلبك : من اليوم وطالع اي واحد بتعرض للظلم في العالم راح اطلع بمظاهرة من شان اتضامن معه..
أم شلبك : يعني دلوقتي الانسان صار اله قيمة وحقوق عندك .. من ايمتى؟؟ !!.. ما هي سايبة والكبير بيوكل الصغير ما أنت شايف شو صاير يا صابر… انا خايفة عليك انت شايف الموجة التانية عملت اه.. وكبار السن اللي زيك اكتر الناس بتعرضوا للكورونا وبيموتوا فيها.
أبو شلبك : مش صحيح … والوضع تحسن والحكومة سمحت بفتح كثير شغلات.. وبعدين أنا وين بدي أروح .. يا إما بتضامن مع المقهورين يا إما بروح السوق بتبضع أغراض البيت.
ام شلبك ( تنفعل ) : طيب .. امبارح رحت السوق وجيبت ( كونتينر ) ورق تواليت يعني خمسين ربطة و2 كيلو كراوية و20 كيس بهارات بسطرما وستين حبة جوزة الطيب ودقة الكحك وحلاوة طحينية وقرفة عيدان.. قرفتنا يا شيخ..!!.
ابو شلبك: وطي صوتك .. ما انتِ عندك كل شي في المطبخ… قلت طيب يا صابر شو اشتري … شو اشتري … فاشتريت ورق التواليت خفت انه تخرب الشطافة.. أفرضي انه الشطافة خربت شو أساوي أنا؟؟.. وبعدها شريت بقيت الأغراض عشان العيد .. أنا قلت يعني أروح اجيب النواقص.
أم شلبك ( تنفعل أكثر ) :… أي عيد.. ونواقص اه ؟؟ اسمع من الآخر..لا تروح ولا تيجي..خليك بالبيت ..جيبت لي الزايدة يا ناقص !!
أبو شلبك : أنا ناقص !!.( ينتفض)أنتِ واحدة ناقصة .. هاي الكورونا سحبتك لعندها …ما بسمح لك أبداً.
أم شلبك ( تهدأ ) : والله أنا خايفة منك وعليك… معلش عصّبت وشديت شوية ..سامحني المهم خليك معايا.
ابو شلبك : طيب شو بدك اياني أساوي .. قصص وقرينا وأخبار واسمعنا وشفنا مسلسسلات وعجنا وخبزنا وزرعنا وقطفنا ونشفنا…وحكينا مكالمات كثيرة مع الأهل والأصحاب وشاركنا بفيديو الزور و
( تقطعه).
ام شلبك : بالزووم
ابو شلبك : بالزمة تسكتي .. بطلت تفرق بالزين ولا ببز واحد …كلها صدور .
ام شلبك : انت انحرفت يا شلبوكتي.. حتى الفاظك تغيرت بأيام الحشرة .
ابو شلبك : بلا حشرة بلا كشرة ..وعلى سيرة الأيام .. شو اليوم ؟
أم شلبك :.. وبعدين… يا حبيبي قلت الك من شوي.. اليوم الخميس .
ابو شلبك : يا ريت لو كان طلع اليوم سبت أو أحد لنرتاح .. ( يتخيل ) ونعمل كعك ..ونكب كب كلنا كبة!! شو رأيك اروح اشتري لوازم الكبة… ولا تعملي مقلوبة زهرة ؟.
أم شلبك : ما بدنا زهرة ولا كبة.. ريلاكس بس.. أهدا يا صابر .
أبو شلبك : طقيت .. بدي اطلع واطش على كيفي.. وبدون ما البس اللفام.. و( تقطعه ام شلبك )
أم شلبك : هو اه اللفام؟؟ .. قصدك الكَمامة!! .
أبو شلبك : الكِمامة للبهايم والنقاب والبرقع والقناع للمرأة واللثام واللفام للرجل أما القمامة..
( تقطعه )
أم شلبك : خلاص ..خلاص مش عايزة اعرف … ( لنفسها) يا ناس اصعب حاجة بالدنيا انك تقعد وتتكلم مع استاذ متقاعد أو عجوز ماتوا اولاد جيله.
أبو شلبك : مش عاجبك خليك بجهلك أحسن… نرجع لموضوعنا. الله يرحمك يا جورج فلويد..( يرفع صوته ) لقد خلقنا لنعيش أحرارا ..وهاي مؤامرة الكورونا ضد الشعوب و كلها كذب… وعلى كل حال أنا مع مناعة القطيع.. وبدي حط راسي بين الروس واقول يا قطاع الروس … انا طالع.. سلام.
أم شلبك : يا شلبوكتي يا جوزي… انت بطلعتك برة البيت، ح تدمرنا !!
(عند الباب الموبايل يرن وابوة شلبك يرد .. يمتقع لون وجهه ويعود لداخل الشقة ).
أبو شلبك ( يبلع ريقة ويتأتأ ): صاحبي شكري رفيق الدرب .. كورونا .. طلع عنده باسور .. باسوورد .. بوززاا .. بوزاتف كورونا.. طلع عنده كورونا.. انصاب بالكورونا !!!!. ( بصوت مرتفع )
عليه العوض .
ام شلبك : وعلينا الحجر .. ( انتهت )
