شباك ابو شلبك :
العنوان: من رحلة الخزان إلى حاوية الأحزان !!
اللغة المستعملة اليوم: الفصيحة والدارجة الفلسطينية.
المناسبة : حاوية قمامة تفتح باباً لرواية خزان .
الزمان : زمن الصمود رغم الصدأ .
المكان : خزان زمان وحاوية حالياً.
عمل أبو شلبك : عامل وعميل .
الشخصيات المشاركة : ابو شلبك وأبو أحمد وأبو الزلف ( ظريف ).
كتب : محمد هارون .
****
الحقيقة : تناقلت الأخباربأن حوالي 60 من العمال الفلسطينيين القي القبض عليهم داخل شاحنة قمامة متجهة للداخل الفلسطيني للبحث عن عمل، في مشهد يعكس قسوة الواقع الفلسطيني وإهداراً لكرامة العمال.
الخيال – الرواية : هذه الحقيقة أعادتنا الى خيال رواية رجال في الشمس إلى حكاية خزان غسان، لنقارن بين الحالتين .
حيث كتب غسان كنفاني مأساة عن رجال لم يطرقوا جدران الخزان ولكن الواقع الحالي في الضفة الفلسطينية كتب نسخة جديدة: رجال يطرقون… لكن الجدران هذه المرة هي التي لا ترد. في رواية كنفاني، رجال يختنقون داخل خزان شاحنة لأنهم صدّقوا أن الصمت طريق النجاة. في الضفة الغربية، عمّال القمامة لم يختنقوا داخل خزان، بل داخل واقع سياسي وإداري مترهل يصرّ على أن يضعهم في “الخزان” نفسه… ولكن في الهواء الطلق.
******
تالياً مشهد مسرحي قصير مستوحى من الرواية إلى الحاوية…
المكان: (إضاءة خافتة، أبو شلبك يجلس على أكياس القمامة كأنه كرسي عرش ملكي . أبو أحمد يقرأ من كتاب خلال فانوس يدوي بهدوء، ابو الزلف ظريف ينظر إلى سقف الحاوية حيث تتسرب خيوط الضوء ويدندن .. (يما مويل الهوى يامه مويلى ضرب الخناجر ولا حكم النذل فيا …يا مه مويل الهوى يامه مويلى ضرب الخناجر ولا حكم النذل فيا) .
أبو شلبك لأبي الزلف : يا زلمة وطي صوتك .. هسه وقت غُنى .. احنا بشو وانت بشو!! .
أبو أحمد : يا عمي خليه يدندن .ويغني … حتى ينسينا الروايح اقل ما فيها.
ظريف : من هنا تتفوق حاسة السمع على حاسة الشم ونحقق النصر ونصل الى أعلى المراحل..و ( يقطعه ابو شلبك)
أبو شلبك : حبيبي، انت شاب، لا وراك ولا قدامك، وانحبست وتبهدلت، بس انا بتفرق معي.. أنا زلمه مشهوروغني و… (يقطعه ابو أحمد).
أبو أحمد : عشان هيك أنت معنا في المزبلة يا زلمه.. يا كبير.. بكفي نفخ بحالك ما احنا عارفين كل اشي… روح سد ديونك ورجع للناس مصاريها.. بيكفي نصب عشان قبل ما تموت .. روح تخلص من كل هالصدا.
ابو شلبك (يرتفع صوته ) : انا ما بسمحلك كل واحد يعرف مستواه .
ظريف ( مازحاً ) : يا عمال الحاوية اتحدوا .. يا ناس وبعدين فيكم.. احنا رايحيين ندور على شغل، وكمان احنا مش لحالنا في المزبلة.. معنا اكثر من خمسين واحد مرميين ورا، بدهم يعيّشوا اولادهم .
أبو أحمد : لعنة الله على حكومتنا ونقاباتنا اللي وصلتنا لهيك وضع .
أبو شلبك : شو يعني.. من الاخر.. بدك ايانا نروح نحارب يا حبيبي ؟؟
ظريف ( مستهزئاً ): لأ خلينا في المزبلة أحسن وبين الكياس السوداء ؟
ابو شلبك ( بصلف وغرور) : يا سيدي الكياس السوداء أحسن من الأكفان البيضاء .
أبو أحمد : والله ما انت قليل يا أبو الخيزران، قصدي يا أبو شلبك .. خلص دق على جدران الحاوية وقلهم نزلوني ما بدي اشتغل .
ابو شلبك : يا رجل انت كل تقرا كلمتين بكتاب بتنجن أكثر . ( صوت وقوف المركبة وفتح بابها الخلفي ) .. نزلوا رووسكم بسرعة.
( تلقى عليهم مجموعة من أكياس القمامة السوداء وهم يحالون تلافيها ) … ( يغلق الباب وتعود المركبة للسير ).
أبو شلبك : أفففف … شو البهدلة هاي!!! ايش هالمصير هذا؟؟ يا جماعة الخير ، احنا فاقدين الكرامة بشرفي !!.
أبو أحمد : بشرفك!! .. يا سيدي من يُدفَع لهذا المصير ليس فاقد الكرامة، بل فاقد الظهر والسند.
ظريف : احنا ركبنا شاحنة الزبالة مش حبّا بالمخاطرة، ركبناها من شان الحصار اللي ضاق علينا من كل جهة.
ابو احمد : ولأن لقمة العيش صارت معركة يومية، ولأن من يفترض أنهم مسؤولون عنا تركونا ه نواجه الجوع والإهانة.
ابو شلبك : لا تكبروا الموضوع وتحكوا كلام جرايد وعاملين فيها كنفاني بالفاكهاني .. انتو شاطرين دايما تلبسو مصايبكم للحكومة .. هي الحكومة اجبرتكم تركبوا ( ترك ) الزبالة وتستقبلوا هاي الكياس؟ .
– تقف السيارة فجأة – اصوات من الخارج وقف مكانك – كل اللي في GARBEG TRUCK ) ) ينزلوا وايدهم لفوق …( يكرر ).
أبو شلبك : يا حبيبي .. اجاك الموت يا تارك الصلاة .
أبو أحمد : يالله .. يا سيدي احنا أحسن وأسعد حظ من أسعد و مروان وأبو قيس… على الأقل هينا عايشين .
ابو شلبك : يا زلمة هلكتنا بأسعد حظ وأسعد مروان !! شو القصة ؟؟
ظريف ( ينظر الى ابو شلبك ): من الأخر… طول ما في السيارة والمسيرة .. أتباع أبو رغال راح نضل تحت النعال …
ابو شلبك : ليش بتتطلع علىّ ؟؟ .. ( يرفع صوته ويدير وجهه للخلف ) يا الله يا حبايبي… يا الله ياللي ورا ..الكل ينزل .. ويسلم نفسه .. عيّدت!!.
انتهى .
