ندوة تستفسر عن قلة الحضور للندوات الأدبية والعلمية العربية في المدن الكندية .

العنوان : ندوة تستفسر عن قلة الحضور للندوات الأدبية والعلمية في المدن الكندية .

اللغة المستعملة اليوم: الفصيحة وبعض العامية. ( الشامية والمصرية)
نشاط ابو شلبك: مدعي ثقافة .
المناسبة: شبه فراغ في التجمعات الثقافية وشبه إجماع لتجمعات الأرجيلية !!! .
الزمان : من زمان.
المكان : قاعة في ميسيساغا- اونتاريو يقام فيها نشاط ثقافي مهجري.

******
كتب: محمد هارون.
– أبو شلبك في الممر المؤدي لقاعة الندوة يسير مهرولاً وخلفه الأصدقاء شكري وأبو صفوح.
ابو شلبك بصوت منخفض: شدوا شوي إحنا تأخرنا على الندوة .. وكأنه الندوة يا شباب قد بدأت .. ما في صوت هدوء يلا استعجلوا.
شكري بعد أن دخلوا القاعة : ما شاء الله والحمد لله أنه لحقنا 3 كراسي فاضيه !!
أبو صفوح : شو عم بتستزرف وبتنكت ابو الشكر.. صحيح كل اللي في القاعة بما فيهم احنا ما بيجوا عشرة .. بس الخير بالجاييين على الطريق ؟؟
ابو شلبك : فعلا لسا بكير اليوم ظروف المطر والبرد اخرت الناس شوية .
شكري : يا عمي انت قلت الساعة سبعة ومتاخرين.. ودي الوقتي الساعة سبعة وتلت… وتلتين القاعة تصفر فيها !! وبدون أفوره مرة تانية.. احنا مش ناقصين يا عمنا.
-يتقدم المضيف على الميكرفون : نعتذر عن التأخير وسنبدأ بعد 5 دقائق.
شكري: هانت.. صبرنا كتير وربنا يسهل .. يميل على ابو صفوح وبصوت منخفض : مش لو رحنا عالقهوة واخدنا نفس شيشه كان أحسن .
أبو صفوح : معك حق .. والله احيانا أنا بدي اتبرا من هالامه الفارطة بعد اللي عم يصير هناك.
أبو شلبك يدلو بدلوه : بس دير بالك في أشراف هناك بترفع راسك فيهم .
ابو صفوح: زي مين بالله؟ .
ابو شلبك : مفكرين وادباء وعلماء كتير منهم في مصر وسوريا والعراق وفلسطين وبقية المبدعين في بلاد العرب.. ما بدي اعد حتى ما انسى حد .
شكري : وما تنساش الناس العاديين اللي بيضحوا بارواحهم بفلسطين ولبنان وأماكن تانية.
ابو صفوح : والله والنعم منك ومنهم .. ما شاء الله .. بس والله انخزلوا يا ابو الشكر!!
.. بدنا وحدة … ( يقطعه عريف الحفل)
– السيدات والسادة الحضور .. نرحب بكم أجمل ترحيب ونقدم لحضراتكم اسماء من سيشارك بندوة اليوم وهم : السيدة الأديبة جورجيت وديع والكاتب طه مصطفى الدمنهوري والشاعر محمد رضوان والمفكر فارس القادري.
ابو صفوح : الله محيهم الشباب.
شكري تصفيق وتصفير : يا مساء الورد على الغاليين.
ابو شلبك : هدوا شباب من شان الله .
عريف الحفل : عنوان ندوتنا اليوم هو حال الثقافة العربية في المهجر الكندي.
ابو شلبك : اسمح لي طالما مسموح للشعب يحكي .. لازم يكون عنوان الندوة مباشرة .. لماذا لا يحضر الامسيات الشعرية والادبية والمسرحيات المحترمة الا جمهور قليل ؟
ابو صفوح : صحيح كلام اخي ابو شلبك .. اقترحوا حلول عشان ما نضل رايحين جايين خري مري.. يعني بلا مؤاخزه من شواربكم .
شكري بصوت منخفض : اسكت يا ابو صفوح .. هو احنا قاعدين بالقهوة ؟؟
عريف الحفل : سؤال كبير .. سنحاول الإجابة عليه معاً وهو .. فعلاً .. لماذا يكون الحضور للندوات والمسرحيات العربية والأمسيات الشعرية محدوداً . وكيف نجعل النشاط الثقافي شعبياً.

ابوصفوح لشكري بصوت منخفض : نزلوا عشاء وشوية مشروب ورقاصة .. وشوفوا الحضور
شكري : نسيت الشيشة يا باشا .
– يدور النقاش طويل ومعمق بين المشاركين ومع الحضور والذي يتركز على
مقترحات لجلب الجمهور الى الأنشطة الأدبية … وبعد ساعتين من النقاش ، خرجوا بتوصيات عديدة وأبرزها :
– تطوير تعليم اللغة العربية ونشر الثقافة العربية للأجيال الجديدة في المجتمع العربي الكندي بوسائل متنوعة وخاصة من خلال الجمعيات والأندية والروابط والسفارات العربية في أتاوا .
– التواصل مع وسائل الإعلام الناطقة بالعربية في كندا بتوفير برامج تعليمية وتثقيفية جاذبة لربط الشباب العربي الكندي بلغتهم ووطنهم إسوة ببقية المجتمعات الاثنية في كندا .
– المتابعة مع الحكومات الكندية ( البلدية والمقاطعة والفيديرالية ) ومع النواب العرب في البرلمان الكندي بتطوير البرامج الخاصة بتعليم اللغة العربية للنشء الجديد .

****
بطريق العودة من الأمسية :
أبو شلبك : انا بشكر ربي.. اني حضرت هاي الأمسية .. فعلا انه في ناس هون برفعوا الراس .
ابو صفوح : أه طبعاً .. إن خليت بليت .
شكري : اه يعني .. انت يا أبو صفوح ماغطلي فيها وعامل نجيب محفوظ.. وحياة ابوك تقول لي أنت امتى آخر أمسية ادبية ولا شعرية حضرتها قبل النهارده؟

أبو صفوح : لا تحرجني أبو الشكر .. صحيح أنا والماغوط كنا رفقة .. بس بصراحة أنا آخر أمسية شعرية حضرتها لما كنت مناضل .. كانت في الشام للشاعر مظفر النواب من خمسين سنة.
شكري: مين دا ؟؟
ابو صفوح : يعني بدك تقول زي .. زي أحمد فؤاد نجم عندكم .
شكري : أحمد فؤاد نجم ..مش داه اللي بيهدل المغنية …اسمها.. نسيت اسمها .. اللي جيت غنت بكندا من فترة قريبة.
ابو شلبك : على سيرة الفنانين اللي بيجوا كندا .. ملاحظ معي انه ما فيش حد منهم معبي العين .
أبو صفوح : المهم يعبوا الجيب يا محترم… والله شكله انت اللي ما بتشوف.
شكري: الناس بتحضر اللي انت ما بتحضروش يا كبير .. الناس بتدفع فلوس بالهبل على الموسيقى الهلس وبتدفع اكتر على الكوميدي شوز .
ابو شلبك : كوميدي شوز!! .. الله يقطع شرك يا ابو الشكر انت بتجيبها من الآخر .
ابو صفوح : بتعرفوا يا شباب .. من كم يوم اجت بنت مغنية امريكانية لتورونتو اسمها تاير سويفت.. الناس دبحت حالها لتحضرها ومنهم ترودو وكبارية البلد حضروها .. لك حتى ابني صفوح حضرها ودفع اللي فوقه واللي تحته ليحضرها وهيو قاعد في البيت مديون .
أبو شلبك : اول شي تاير بلاها عشان جماعة كنديان تاير ما يزعلوا منك .. البنت اسمها تايلور ..و اظن انه هاي الفنانة هي بنت المغني الامريكاني جيمس تايلور والله اعلم .
شكري : فعلاً .. انا كنت بسمعه زمان .
ابو صفوح : بلا خرط ومعط وكزب !!
شكري : يعني انت وهو نازلين هري ورغي .. جميس تايلور وجميس بوند ..ومش عارف مين!! وانا ساكت.. يا عمي إحنا عايزين نوصل بسرعة وبلاش نضيع الوقت على الفاضي .
ابو صفوح : يلا على السريع نروح قهوة الغفير او مطعم بيت عمتي لنمخمخ .
ابو شلبك : ما فيش فايدة …. طول عمرك يا زبيبة !!