شلبكيات

وبعدين….

شباك أبو شلبك ... فرفطة روح

مشهد تمثيلي بعنوان : فرفطة روح
….المكان : شقة أبو شلبك بضواحي توروتنو
الزمان : سنة أولى – حقبة الكورونا …
المناسبة : الحظر والحشر…
اللغة المستعملة : الفصيحة و العامية الفلسطينية و المصرية.
كتب : محمد هارون ..
***
أم شلبك ( عند باب الشقة وابو شلبك خارجاً ) : رايح فين؟
ابو شلبك ) مستاءاً) : رايح صلاة الجمعة يا ستي …عندك اعتراض؟؟.
ام شلبك : أستغفر الله العظيم ..!!
أبو شلبك : شو هو أنا كفرت وصرت من جماعة أبو جهل!!.
أم شلبك : أنت صاير من جماعة الجهل والخرف.. أنت رايح تصلي الجمعة ؟
أبو شلبك : نعم .. يا ستي أخيراً الحكومة فتحت الكنايس والمساجد.. واليوم سمحت النا بصلاة الجمعة وبشروط صعبة.. عشان هيك بدي أطلع بكير شوي، حتى أحجز مساحة أصلي فيها الجمعة .
أم شلبك : اليوم الخميس يا مولانا !!
ابو شلبك : شووو.. وين الرزنامة.. وين الساعة ( ثم ينظر لساعته ) Thursdayصح الخميس !!! ..هذا اللي اجانا من كورونا…
أم شلبك : الخميس .. يلا ارتاح … يعني ما سألتنيش عن أخبار أهلي بمصر ..انا كلمتهم قبل شوية.
أبو شلبك :معلش والله انا مشلبك.. شو أخبارهم طمنيني ان شاء الله ما حد تضرر من هالكوفيد 17 ؟
أم شلبك : الحمد لله ما حدش تضرر .. ( ترفع صوتها) من الكوفيد 19
أبو شلبك: الحمد لله وأهلي بالبلد وضعهم كويس لكن الكل متبهدل من الكوفيد ال ..كم الرقم ( ام شلبك: 19 ) ( يكمل ) صح 19 .. طالما الامور ماشية و ما دام أنا لابس لابس خليني اروح اصلي الظهر بالجامع .
أم شلبك : لسه الجوامع ما فتحتش بمنطقتنا الا لصلاة الجمعة….. ارتاح يا حج .
أبو شلبك : هو ضل فيها حج حتى الحج سكروه السنه .. استغفر الله وبعدين بهالوباء المجرم .. تقولي ابليس راكبنا !!.
أم شلبك : ربنا كريم… . اقعد في البيت وخلاص .
ابو شلبك : صرت لابس ..شو أساوي يعني .. طيب ( يفكر ) خلينا أكب الزبالة .
أم شلبك : هاي خامس مرة بتكب الزبالة اليوم…وبعدين فيك، يا راجل ريلاكس .. STAY HOMEالتعليمات بتقول كدة؟.
أبو شلبك: ما هو اشي بجنن!! ساعة بيقولوا النا اطلعوا بره البيت في مشكلة جوا البناية، وساعة بيقولوا خليكم في البيت في مشكلة برة البناية .. وبعدين وين نروح؟؟..
أم شلبك : أنا عارفة.. أنت بس عايز تطلع وتنقل المرض لينا.. بكفي أنك من يومين تلاته كدة طلعت طول النهار ومش عارفة رحت فين ؟.
أبو شلبك : صراحة… طلعت مع صاحبي أبو صفوح، وشاركنا بمظاهرة ضد العنصرية تضامنا مع صديقي جورج فلويد .. والحمد لله ..ما جبت المرض معي .
أم شلبك : انت بتتلكك .. في العالم أكثر من مليون فلويد وما عمركش ما تعاطفت معهم .
أبو شلبك : من اليوم وطالع اي واحد بتعرض للظلم في العالم راح اطلع بمظاهرة من شان اتضامن معه..
أم شلبك : يعني دلوقتي الانسان صار اله قيمة وحقوق عندك .. من ايمتى؟؟ !!.. ما هي سايبة والكبير بيوكل الصغير ما أنت شايف شو صاير يا صابر… انا خايفة عليك دخلنا بالموجة التانية.. وكبار السن اللي زيك اكتر الناس بتعرضوا للكورونا وبيموتوا فيها.
أبو شلبك : مش صحيح … والوضع تحسن والحكومة سمحت بفتح كثير شغلات.. وبعدين أنا وين بدي أروح .. يا إما بتضامن مع المقهورين يا إما بروح السوق بتبضع أغراض البيت.
ام شلبك ( تنفعل ) : طيب .. امبارح رحت على الحلاق مرتين مع انه قافل ورحت السوق وجيبت ( كونتينر ) ورق تواليت يعني خمسين ربطة و2 كيلو كراوية و20 كيس بهارات بسطرما وستين حبة جوزة الطيب ودقة الكحك وحلاوة طحينية وقرفة عيدان.. قرفتنا يا شيخ..!!.

ابو شلبك: وطي صوتك .. ما انتِ عندك كل شي في المطبخ… قلت طيب يا صابر شو اشتري … شو اشتري … فاشتريت ورق التواليت خفت انه تخرب الشطافة.. أفرضي انه الشطافة خربت شو أساوي أنا؟؟.. وبعدها شريت بقيت الأغراض عشان العيد .. أنا قلت يعني أروح اجيب النواقص.
أم شلبك ( تنفعل أكثر ) :… أي عيد.. ونواقص اه ؟؟ اسمع من الآخر.. لا تروح ولا تيجي.. خليك بالبيت ..جيبت لي الزايدة يا ناقص !!
أبو شلبك : أنا ناقص !!..( ينتفض ) ..أنتِ واحدة ناقصة .. هاي الكورونا سحبتك لعندها ما بسمح لك أبداً.
أم شلبك ( تهدأ ) : والله أنا خايفة منك وعليك… معلش عصّبت وشديت شوية .. سامحني المهم خليك معايا.
ابو شلبك : طيب شو بدك اياني أساوي .. قصص وقرينا وأخبار واسمعنا .. وشفنا مسلسسلات وعجنا وخبزنا وزرعنا وقطفنا ونشفنا… وحكينا مكالمات كثيرة مع الأهل والأصحاب بفيديو الزور .
ام شلبك : بالزووم
ابو شلبك : بالزمة تسكتي .. بطلت تفرق بالزين ولا ببز واحد …كلها صدور .
ام شلبك : انت انحرفت يا شلبوكتي.. حتى الفاظك تغيرت بأيام الحشرة .
ابو شلبك : بلا حشرة بلا كشرة ..وعلى سيرة الأيام .. شو اليوم ؟
أم شلبك :.. وبعدين… يا حبيبي قلت الك من شوي.. اليوم الخميس .
ابو شلبك : يا ريت لو كان طلع اليوم سبت أو أحد لنرتاح .. ونعمل كعك ..ونكب كب كلنا كبة!! شو رأيك اروح اشتري لوازم الكبة ولا تعملي مقلوبة زهرة ؟.
أم شلبك : ما بدنا زهرة ولا كبة.. ريلاكس بس.. أهدا يا صابر .
أبو شلبك : فرفطت روحي .. بدي اطلع واطش على كيفي.. وبدون ما البس اللفام.. و( تقطعه ام شلبك )
أم شلبك : هو اه اللفام؟؟ .. قصدك الكَمامة!! .
أبو شلبك : الكِمامة للبهايم والنقاب والبرقع والقناع للمرأة واللثام واللفام للرجل أما القمامة.. ( تقطعه مرة أخرى).
أم شلبك : خلاص ..خلاص مش عايزة اعرف … ( لنفسها) يا ناس اصعب حاجة بالدنيا انك تقعد وتتكلم مع استاذ متقاعد أو عجوز ماتوا اولاد جيله.
أبو شلبك : مش عاجبك خليك بجهلك أحسن… نرجع لموضوعنا. الله يرحمك يا جورج فلويد..( يرفع صوته ) لقد خلقنا لنعيش أحرارا ..وهاي مؤامرة الكورونا ضد الشعوب و كلها كذب… وعلى كل حال أنا مع مناعة القطيع.. وبدي حط راسي بين الروس واقول يا قطاع الروس … انا طالع.. سلام.
أم شلبك : يا شلبوكتي يا جوزي… انت بطلعتك برة البيت، ح تدمرنا !!
( عند الباب الموبايل يرن وابوة شلبك يرد .. يمتقع لون وجهه ويعود لداخل الشقة ) .
أبو شلبك ( يبلع ريقة ويتأتأ ): صاحبي أبو صفوح رفيق الدرب .. كورونا .. طلع عنده باسور .. باسوورد .. بوززاا .. بوزاتف كورونا.. طلع عنده كورونا.. انصاب بالكورونا !!!!. ( بصوت مرتفع )
عليه العوض .
ام شلبك : وعلينا الحجر .. ( انتهت )

اظهر المزيد

مقالات ذات صلة

زر الذهاب إلى الأعلى
error: Content is protected !!
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock