حوار شلبكي في يوم التضامن

حوار التضامن

كتب : محمد هارون

****
على الواتسب … وردت مكالمة من رقم غريب على موبايل أبو شلبك… فرد قائلا:
الو مين معي ؟
الصوت : انا شهيد فلسطيني

ابوشلبك: شهيد فلسطيني .. بلا مسخرة وقلة حيا ومزح ما له طعمه
الصوت: انا ما بمزح أنا فعلاً شهيد فلسطيني حابب احكي معك كصحفي من شان تنقل وجهة نظرنا للقراء .
ابو شلبك: ( يستهزأ ) طيب يا غالي يا شهيد يا بطل .. أول شي من اي تنظيم انت ؟
الصوت : انت ماعندك غير هذا السؤال؟ احنا هون نسينا هاي المواضيع .
أبو شلبك : يعني شو بدك اسالك يا فالح ؟
الصوت : مثلا من شو استشهدت؟ باي معركة استشهدت؟ يعني هيك اسئلة بتجمع ما بتفرق !!
ابو شلبك : عن أي مناسبة بدك تحكي؟
الصوت : بمناسبة يوم التضامن العالمي مع الشعب الفلسطيني.
ابو شلبك: احنا ناقصين تصريحات وبيانات!!
الصوت : يا سيدي اسمع واذا ما عجبك ما تنشره .
ابو شلبك : تفضل .
الصوت : قول للناس انه تضامن العالم معنا وتخصيص يوم له كلفنا كثير من الشهداء والجرحى والاسرى وغيره حتى تعرف الناس قضيتنا وتتعاطف معنا وبعضهم كان بيدعمنا .
أبو شلبك : كلام سليم… بس حاليا الناس بدت تبعد عنا وصفّت قضيتنا بعيدة عن المقدمة .
الصوت : أكيد انت كصحفي بتعرف ليش؟
ابو شلبك : طبعا بعرف .. لأن الهجمه الامبريالية العالمية وانكماش البروليتاريا في عالم متعدد الاقطاب و..
الصوت : يا زلمه من شان الله بلا كلام مصدّي .. انت أكيد بتعرف ليش الناس بعدت عنكم ؟
ابو شلبك : ليش يا ابو العريف ؟
الصوت : لانكم هَمَل و..
ابو شلبك : ما بسمحلك..
الصوت : كول هوا واسمع احسن والله بسحبك لعندي وبرميك بالقسم التاني تنشوا زي الدرة.
ابو شلبك : تفضل .. تفضل .. كمل كمل….
الصوت : وبتحبوا الكراسي وبتستمتعوا بالانقسامات والردح لبعض !!.. وهسا هذا الكلام بتنقله للقراء .. اللهم اني قد بلغت.. سلام .
ابو شلبك : طول بالك .. ما تمشي .
الصوت : طيب قبل ما اقطع المكالمة عندي الك وللقراء سلام من دلال المغربي .
ابو شلبك : مين دلال ؟؟
الصوت : يا حبيبي!! انت صحفي ؟؟ على كل حال دلال المغربي هي أول من أقامت الجمهورية الفلسطينية.
ابو شلبك : أي سنة ؟ طيب .. وكيف تتولى امرأة شؤون العامة ؟
الصوت ينقطع طوط طوط طوط بيب بيب طوط بيب طووووووووووووووط

يصحو ابو شلبك على اصوات قافلة من الحافلات والسيارات من خلفه يطلقون ( زماميرهم ) لانه نائم على

( السترينج ) في سيارته على الاشارة الضوئية صبيحة 29 تشرين ثاني نوفمبر .
المهم : حاليا ابو شلبك في سجن المرور يبحث عن كفيل .