شلبكيات

من سلسلة شباك ابو شلبك – العدد 88

العنوان : حوار التضامن
المناسبة : التضامن العالمي مع الشعب الفلسطيني
اللغة المستخدمة : المحكية الفلسطينية والفصيحة
عمل أبو شلبك:
الزمان :آواخر نوفمبر 2019
المكان : أمام الإشارة الضوئية
كتب : محمد هارون
***
على الواتسب … وردت مكالمة من رقم غريب على موبايل أبو شلبك… فرد قائلا:
الو مين معي ؟
الصوت : انا شهيد فلسطيني .

ابوشلبك: شهيد فلسطيني !! .. بلا مسخرة وقلة حيا ومزح ما له طعمه
الصوت: انا ما بمزح أنا فعلاً شهيد فلسطيني حابب أحكي معك كصحفي من شان تنقل وجهة نظرنا للقراء .
ابو شلبك: ( يستهزأ ) طيب يا غالي يا شهيد يا بطل .. أول شي من اي تنظيم انت ؟
الصوت : انت من أولها ماعندك غير هذا السؤال؟ احنا هون نسينا هاي المواضيع .
أبو شلبك : يعني شو بدك اسألك يا فالح ؟
الصوت : مثلا كيف استشهدت؟ باي معركة استشهدت؟ يعني هيك اسئلة بتجمع ما بتفرق !!
ابو شلبك : طيب عن شو بدك تحكي وبأي مناسبة ؟
الصوت : بمناسبة يوم التضامن العالمي مع الشعب الفلسطيني.
ابو شلبك: احنا ناقصين تصريحات وبيانات!!
الصوت : يا سيدي اسمع واذا ما عجبك ما تنشره .
ابو شلبك : تفضل .
الصوت : قول للناس انه تضامن العالم والناس معنا وتخصيص يوم له كلفنا كثير من الشهداء والجرحى والأسرى وتضحيات مادية كبيرة حتى تعرف الشعوب قضيتنا وتتعاطف معنا وبعضهم كان بيدعمنا .
أبو شلبك : كلام سليم… بس حاليا الناس بدت تبعد عنا وصفّت قضيتنا بعيدة عن المقدمة .
الصوت : أكيد انت كصحفي بتعرف ليش؟
ابو شلبك : طبعا بعرف .. لأن الهجمه الامبريالية العالمية وانكماش البروليتاريا في عالم متعدد الاقطاب و..
الصوت : يا زلمه من شان الله بلا كلام مصدّي .. انت أكيد بتعرف ليش الناس بعدت عنكم ؟
ابو شلبك : ليش يا ابو العريف ؟
الصوت : لانكم هَمَل و..
ابو شلبك : ما بسمحلك..
الصوت : كول هوا واسمع احسن والله بسحبك لعندي وبرميك بالقسم التاني تنشوا زي الدرة.
ابو شلبك : تفضل .. تفضل .. كمّل كمّل….
الصوت : وبتحبوا الكراسي وبتستمتعوا بالانقسامات والردح لبعض !!.. وهسا هذا الكلام بتنقله للقراء .. اللهم اني قد بلغت.. سلام .
ابو شلبك : طوّل بالك .. ما تمشي .. اعطيني أدلة اقدمها للقراء على صحة كلامك.
الصوت: غير الأخطاء الكبيرة السابقة ، حالياً .. في مجموعة من أبناء شعبنا في الوطن والمنافي و للأسف بتتنطح لقضايا ما بتفهم فيها بتصرح على التفزيونات وبتصدر فيديوهات وبتكتب مقالات كلها ركيكة هزيلة بتشم من خلفها روائح فصائلية او انتهازية عفنة، يا ناس .. قضيتنا بحاجة لمجموعة من المحترفين وليس لمجموعة من (المتحسين الأوغاد ) كمان بعض الناس بدأت تؤلّه القيادات وكأنه تضحياتنا الجماعية لكانت لهذه الزعامات ولأسرهم … بيكفي حكي .
أبو شلبك : كمّل حديثك … وإلاّ بتخاف يقطعوا الراتب عن أسرتك!!! .
الصوت : لا تفكرني نذل مثلك .. ولأني فلسطيني كنعاني أصيل استشهدت بكير وانت وبعض الصحفيين والاعلاميين النزيقين والسياسين الهَمَل عايشين برغد على قفى المسخمين من أهلنا … على كل حال قبل ما اقطع المكالمة وأخلص من سحنتك، عندي أمانة لازم اسلمها الك وللقراء وهي سلام من دلال المغربي .
ابو شلبك : مين دلال ؟؟
الصوت : يا حبيبي!! أأنت صحفي ؟؟ على كل حال دلال المغربي هي أول من أقامت الجمهورية الفلسطينية.
ابو شلبك : أي سنة ؟ طيب .. وكيف تتولى امرأة شؤون العامة ؟
الصوت ينقطع طوط طوط طوط بيب بيب طوط بيب طووووووووووووووط
يصحو ابو شلبك على اصوات قافلة من الحافلات والسيارات من خلفه يطلقون ( زماميرهم ) لانه نائم على ( السترينج ) في سيارته على الاشارة الضوئية صبيحة 29 تشرين ثاني نوفمبر .
المهم : حاليا ابو شلبك في سجن المرور يبحث عن كفيل .

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock